Ministri i Mbrojtjes, Ejup Maqedonci ka marrë pjesë në Forumin e Sigurisë së Halifaxhit, të mbajtur në Taipei të Tajvanit.
Në njoftimin e Ministrisë së Mbrojtjes thuhet se në këtë panel, ministri diskutoi së bashku me dr. Tamara Wittes, presidente e “National Democratic Institute”, dhe Jack McCain nga “McCain Institute” mbi mjedisin global të sigurisë, kërcënimet ndaj vlerave demokratike dhe rrugët për fuqizimin e partneritetit ndërmjet vendeve demokratike të botës.
Ministri Maqedonci prezantoi progresin e Republikës së Kosovës në ndërtimin e një demokracie funksionale dhe theksoi që ky sukses është rezultat i partneritetit të ngushtë me vendet demokratike që kanë dhënë përkrahje të vazhdueshme.
Gjithashtu, ai u shpreh se ruajtja e vlerave demokratike përballë regjimeve autokratike kërkon kultivimin e partneriteteve dhe aleancave të forta mes shteteve që besojnë në demokraci dhe vlerat që ajo përfaqëson.
“Ne kemi arritur shumë në ndërtimin e një demokracie funksionale dhe të qëndrueshme në Kosovë. Kjo është falë mbështetjes së partnerëve tanë ndërkombëtarë, të cilët na kanë ndihmuar në çdo hap të rrugës. Kjo mbështetje është vendimtare për ruajtjen e vlerave demokratike dhe përballimin e kërcënimeve ndaj tyre”, tha ministri Maqedonci.
Ministria e Mbrojtjes mbetet e përkushtuar për të vazhduar bashkëpunimin dhe forcimin e partneriteteve me vendet demokratike, me qëllim të ruajtjes së sigurisë dhe stabilitetit në rajon dhe më gjerë.
