Politologu, Albinot Maloku, vlerësoi se vizita e përfaqësuesit të posaçëm të Bashkimit Evropian për dialogun Kosovë – Serbi, Miroslav Lajçak të enjten dhe të premten në Prishtinë, do të jetë vizita e fundit për përgatitjet e 18 marsit në Ohër.
Madje sipas tij, Kosova nuk ka pasur ndonjëherë synim thelbësor njohjen de fakto.
“Njohje de fakto nuk është që ka qenë as synim thelbësor i Kosovës, pra edhe po të ishte njohje de fakto, ky nuk ka qenë synim i Kosovës. Çështja e ardhjes deri te 27 shkurti i 2023-ës, është më thellë në histori në kuptimin e dialogut. Prandaj, është provuar vullneti i palëve për situatën e këtij dokumenti. Vizita e Lajçakut do të jetë e fundit për përgatitjet e 18 marsit”, deklaroi Maloku në emisionin “Ditari”.
I pyetur se sa mund të ketë mbështetje kjo marrëveshje, Maloku tha se këtë përgjegjësi e ka mazhoranca, pasi sipas tij, ata do duhej të dinin ta menaxhonin këtë situatë.
“E dimë gjithashtu që të gjitha ato manovrime politike me 6 e 7 pika, nuk janë marrë fort në konsideratë”, shtoi tutje ai në Tëvë1.
Njëherit, Maloku theksoi që opozita aktuale do duhej të ishte më konstruktive në këtë proces, përcjell teve1.info.
“E kjo për faktin që këtu ndërlidhet edhe faktori ndërkombëtar, konkretisht aleatët e Kosovës”, theksoi Maloku.
Ndërkaq, se a janë marrë parasysh qëndrimet e Kosovës, Maloku konsideroi që nuk është marrë parasysh asnjë qëndrim i saj./teve1.info/.
