Kryetari i Degës së LDK-së në Podujevë, Ekrem Hyseni ka thënë se magjistralja Prishtinë – Podujevë është preokupim i qytetarëve dhe jo i qeverisë aktuale.
Ai në emisioni “Info Nata” në Tëvë1 tha se qeverisja aktuale kishte premtuar se ky projekt të përfundojë gjatë vitit 2022.
“Rruga Prishtinë – Podujevë është preokupim i qytetarëve dhe jo i qeverisë, pasi kjo ishte dashur të këtë veprim dhe jo preokupim. Kjo rrugë shkakton një rrugë pritje për të shkuar në punë dhe po aq për t’u kthyer. Rrjetet sociale po thuajse çdo ditë janë të mbushura me fotografi nga kolonat në atë rrugë, por çfarë është edhe më e rëndësishme për t’u theksuar është premtimi që është bërë që do të përfundojë gjatë vitit 2022. Vet zotëria që është këtu me shefin e tij (Albin Kurti) kanë premtuar me krenari të paparë – gjatë thyerjes së heshtjes zgjedhore, e cila është thyer për herë të parë në Kosovë. Ajo pra është premtuar që do të mbarojë në vitin 2022 dhe sot jemi në maj 2023 dhe vazhdojmë me preokupim. Do të punojmë në retrospektive dhe të kthemi mbrapa në vitin 2022 apo të quajmë dështim”, ka thënë Hyseni.
Për këtë deklaratë ka reaguar kryetari i kësaj komune, Shpetim Bulliqi, i cili vjen nga radhët e Vetëvendosjes. Bulliqi tha se ky është projekt i dështuar i LDK-së.
Ai tha se kjo parti e ka shfrytëzuar këtë projekt që nga viti 2015 për të përfituar vota, duke theksuar se partia e tij, nuk mund të premtojë ndonjë afat kohor se kur mund të përfundojë kjo rrugë. Kjo pasi sipas tij, ky projekt kërkon kohë dhe punë.
“Nëse dikush ka dështuar në këtë proces janë ata që e kanë nisur (LDK) me gënjeshtra nëpër fushata zgjedhore për të përfituar vota që nga viti 2015. Një projekt i cili është nisur pa shpronësim, pa projekt adekuat, duke premtuar herë mbi ura e herë nën ura, dmth na ka sjell këtu ku jemi. Kjo qeverisje përkundër vonesave ne mundemi me i quajtë, sepse projekti kërkon kohë. Afate kohore nuk mund të jepen pasi është projekt që kërkon kohë dhe punë. Është dashur të niste dhe të përfundojë mbarë dhe mirë qysh nis edhe projekti, duke filluar me shpronësim të sipërfaqeve, pasi askush nuk të lejon me u fut në prona private. Pra këtë punë e ka nisur mbarë kjo qeveri, pasi ka nisur shpronësimin. Ky hap i bërë i hap rrugë procesit që të fillojë me u realizu. Unë besojë shumë shpejt do të përzgjidhen operatorët fitues dhe projekti të fillojë”, tha Bulliqi. /teve1.info
