Ministri i Shëndetësisë, Arben Vitia, ka deklaruar se mungesa e barit palbociclib në Klinikën e Onkologjisë gjatë vitit 2026 është shkaktuar nga rritja e kërkesave për këtë medikament dhe problemet në procedurat e furnizimit.
Duke iu përgjigjur deputetes së PDK-së, Sala Jashari, në interpelancën për mungesën e barnave onkologjike dhe rastin e pacientes me kancer të gjirit që kishte mbetur katër muaj pa terapi, Vitia tha se ky medikament ishte përfshirë për herë të parë në Listën e Barnave Esenciale në vitin 2025.
Ai bëri të ditur se planifikimi fillestar ishte bërë për 40 pacientë.
“Gjatë kësaj kohe është parë se ka kërkesa më të larta për këtë medikament, pasi që një pjesë e pacientëve të cilët e kanë siguruar më herët privatisht, duke mos qenë në listën e barnave esenciale, kur është futur ky bar në listën e barnave esenciale, kanë filluar normalisht ta kërkojnë këtë medikament në Klinikën e Onkologjisë”, tha Vitia.
Sipas tij, kontrata e parë ishte lidhur më 17 korrik 2025, ndërsa furnizimi i parë kishte arritur në mesin e gushtit të po atij viti.
Vitia theksoi se kërkesa për këtë bar ishte dyfishuar, duke bërë që kontrata të shpenzohej më shpejt sesa ishte planifikuar.
“Kontrata është shpenzuar 130% sipas mundësive ligjore që na jep ligji dhe ajo që ishte planifikuar që për një vit të shpenzohej për 100%, për shkak të dyfishimit të pacientëve që kanë kërkuar këtë bar, ka rezultuar me shpenzim prej 130% për vetëm 9 muaj”, deklaroi ministri.
Ai shtoi se procedurat e reja të furnizimit nuk mund të fillonin pa aprovimin e buxhetit.
Duke folur për tenderin, Vitia tha se përpjekja e parë kishte dështuar për shkak të mungesës së ofertuesve.
“Oferta e parë, fatkeqësisht, ka dështuar sepse nuk ka pasur asnjë ofertues. Menjëherë pas dështimit të ofertës së parë, është hapur tenderi përsëri me procedura tash të përshpejtuara dhe, me datën 30 korrik 2026, është lidhur kontrata dhe, me datën 18 gusht të këtij viti, ka filluar liferimi në barnatoren qendrore”, tha ai.
Ministri pranoi gjithashtu se furnizimi me barna për Klinikën e Onkologjisë gjatë vitit 2026 nuk kishte qenë në nivelin e dy viteve paraprake.
“Gjatë vitit 2026, furnizimi me barna për nevojat e Klinikës së Onkologjisë nuk ka qenë në nivelin e vitit 2024 dhe 2025”, u shpreh Vitia.
Si shkaqe të tjera të mungesës së barnave, ai përmendi mungesën e autorizimeve të marketingut për disa medikamente, vonesat në furnizim, dështimin e tenderëve për shkak të mungesës së ofertuesve dhe tejkalimin e shumave të planifikuara për blerjen e barnave.
