Mëngjesin e së shtunës dolën me një propozim.
Lëvizja Vetëvendosje u bëri një thirrje goxha interesante Partisë Demokratike të Kosovës e Lidhjes Demokratike të Kosovës.
Tre kandidatë për president, ua dha mundësinë PDK-së e LDK-së që t’i propozojnë, me kushtin që mos të jenë politik.
Me këtë rast, Glauk Konjufca e Fatmire Kollçaku do tërhiqen nga kandidatura.
“Le të na i sjellin deri nesër mbrëma tre emra të personaliteteve unifikuese, jashtë skenës aktuale politike, sepse presidenti duhet të jetë shprehje e unitetit të popullit, ashtu e kërkon kushtetutshmëria jonë”, tha Kurti.
Por as kjo ofertë s’ua mbushi syrin opozitës.
Çështja e presidentit për PDK-në është e mbyllur.
“Ka pasur kohë të mjaftueshme me i bërë të gjitha veprimet e nevojshme në mënyrë serioze, të përgjegjshme, në mirëbesim dhe në besim reciprok e në partneritet, jo me tentu që me oferta joserioze nëpër media me iu drejtu opinionit publik”, tha kryetari i PDK-së, Bedri Hamza.
Pak më shpresëdhënës u duk kreu i LDK-së, megjithëse propozimi në rrejte sociale s’iu duk fort serioz.
Megjithatë Lumir Abdixhiku kërkon marrëveshje politike, si lloj garancie që Vetëvendosje ua jep votat kandidatit të tyre, që lehtë mund të jetë edhe Vjosa Osmani.
“Në qoftë se ka dashur marrëveshje politike me LDK-në dhe do marrëveshje politike me LDK-në, atëherë LDK mund të propozojë emra. Ne s’kemi nevojë të propozojmë tre, propozojmë një. Mund të jetë edhe Vjosa Osmani, por le të na tregojë ai 66 votat për këtë emër. Mund të jetë, por njëherë duhet të vendoset ajo marrëveshje politike mes nesh”.
Anash në propozim e la AAK-në, ani se kreu i saj, pavarësisht injorimit, thotë se kjo s’është gjë tjetër veçse manovër politike që çon në zgjedhje.
“Është një lojë realisht…ai po i thotë vetëm për një lloj alibie, me ia mbulu fajin e tij, për faktin që po e dërgon vendin në zgjedhje”, tha Haradinaj.
Deri në përfundimin e afatit kushtetues për zgjedhjen e presidentit, kanë mbetur vetëm edhe tre ditë.
