Ka nisur faza e fjalëve përfundimtare në gjykimin ndaj Sami Lushtakut dhe të akuzuarve të tjerë në rastin “Drenica 1”, ku ata akuzohen për frikësim të dëshmitarëve dhe pengim të procedurës zyrtare.
Prokurorja Florije Salihu Shamolli ka kërkuar nga Gjykata Themelore në Prishtinë që të akuzuarit të shpallen fajtorë për veprat penale me të cilat ngarkohen.
Sipas Prokurorisë, të akuzuarit, si grup kriminal, dyshohet se nga qershori i vitit 2013 deri në shtator të vitit 2015 kanë penguar dëshminë dhe kanë frikësuar gjatë procedurës zyrtare dy dëshmitarë, me qëllim që ata të ndryshonin deklaratat e tyre në rastin “Drenica”.
Akuzat lidhen me rastin për keqtrajtimin e civilëve në Likoc gjatë luftës, për të cilin disa persona tashmë janë dënuar. Të gjithë të akuzuarit janë deklaruar të pafajshëm në seancat e mëhershme.
Në fjalën e tij përfundimtare, Sami Lushtaku ka mohuar akuzat, duke thënë se prej 13 vitesh po përballet me procese gjyqësore pa prova dhe argumente.
“Unë që 13 vite përsekutohem nga drejtësia e EULEX-it pa argumente dhe pa fakte. Gjykimi im ka ndodhur për krime lufte, ku kam marrë një dënim prej 12 vitesh dhe kam mbajtur 4 vjet burg, e më pas jam shpallur i pafajshëm”, ka deklaruar Lushtaku.
Ai ka thënë se dëshmitarët e përmendur në rast nuk kanë qenë dëshmitarë të drejtpërdrejtë ndaj tij dhe se disa nga të akuzuarit nuk i ka njohur.
“As dëshmitari F as C nuk kanë qenë dëshmitarë të drejtpërdrejtë ndaj meje. Një pjesë të këtyre të akuzuarve unë nuk i kam njohur asnjëherë. Prandaj, për mua është e rëndësishme që unë e ndiej veten të pafajshëm dhe e ndiej veten që 13 vite i penalizuar dhe i përndjekur nga gjykatat e EULEX-it”, ka thënë Lushtaku.
Ai ka shtuar se nuk ka kërkuar mëshirë, por vetëm drejtësi.
“Unë asnjëherë nuk kam kërkuar mëshirë, kam kërkuar gjithmonë vetëm drejtësi, edhe në këtë rast kërkoj vetëm drejtësi”, ka deklaruar Lushtaku.
