Deputeti i Partisë Demokratike të Kosovës, Mërgim Lushtaku tha se qëllimi i Lëvizjes Vetëvendosje është që ta zvarritë procesin e zgjedhjes së kryeparlamentarit deri pas zgjedhjeve lokale.
Sipas tij, mazhoranca vazhdon të jetë kokëfortë sa i përket ndryshimit të emrit për kryeparlamentare dhe se nuk po reflekton për t’i ndryshuar sipas tij veprimet antikushtetuese dhe antiligjore.
Para nisjes së seancës konstituive për të njëzet e tetën herë, Lushtaku para gazetarëve tha se problemet e qytetarëve po shtohen, derisa siç tha ai LVV-ja po e neglizhon procesin e konstituimit.
“Nuk e di cili kurban duhet të prehet që të mbahet një seancë konstituive që të tregohet unitet. Po tregohet se ka ende kokëfortësi nga mazhoranca dhe nuk ka një reflektim që t’i ndryshojnë edhe veprimet antikushtetuese dhe antiligjore. Ende nuk kemi ndonjë aktgjykim apo akt vendim të Gjykatës Kushtetuese ku tregon se cila është e drejta në këtë aspekt. Duan ta neglizhojnë procesin e konstituimit të kuvendit dhe në këtë formë po trashen problemet e qytetarëve…Rroga iu ecë edhe deputetëve edhe qeverisë, edhe luksi i qeverisë po ecë më shumë se çdo gjë…Vetëvendosja e ka si ide zvarritjen e procesit deri pas zgjedhjeve lokale pastaj të shohin se sit ë ecet tutje”, tha Lushtaku.
Sot po mbahet seanca konstituive për herë të njëzet e tetë me qëllim për të zgjedhur kryeparlamentarin.
