Publicisti nga Shqipëria, Fatos Lubonja, ka folur lidhur me arrestimin e ish-agjentit të FBI, Charles McGonigal, i cili thuhet se ka shkelur sanksionet duke punuar për oligarkun rus, Oleg Deripaska.
Mirëpo, sa i përket lidhjes së tij me kryeministrin e Shqipërisë, Edi Rama, Lubonja tha se McGonigal është korruptuar për të hapur një proces ndaj opozitës.
“Unë gjykoj që me paratë, duke u dhënë interesa është korruptuar një aktor i rëndësishëm i FBI-së, që të bëjë këtë veprim dhe të hapë një proces ndaj opozitës dhe për ta përdorur në luftën politike shqiptare. Pra, janë dhënë para për tu bërë ky veprim dhe ky njeri tregon që i ka bërë këto punë edhe në raste tjera. Prandaj, duke qenë ish-zyrtari i FBI-së, Charles McGonigal, njeri i korruptueshëm, Rama është një nga ata që gjuan shumë njerëzit e korruptueshëm në përgjithësi, deklaroi Lubonja përmes një lidhjeje direkte në emisionin “Info Nata” në Tëvë1.
I pyetur se a mund të fillojë ndonjë hetim ndaj Ramës për këto çështje, Lubonja tha se në Shqipëri do fillojë patjetër, mirëpo sa i përket amerikanëve, ai theksoi se për këtë gjë nuk është ekspert.
Megjithatë, Lubonja shtoi se Edi Rama në luftën e tij për pushtet absolut dhe për eliminimin e çdo kundërshtari, ka përdorur të gjitha asetet që i ka dhënë pushteti./teve1.info/.
