Përmes një postimi në Facebook, LS u shpreh se kjo marrëveshje është “dëshmi se dialogu është mënyra e vetme për zgjidhjen e çështjeve të hapura”.
Sipas këtij subjekti politik, marrëveshja parandalon mundësinë që të “pushtohet nënstacioni në Vallaq”.
“Kjo (Marrëveshja v.j.) parandaloi mundësinë e pushtimit brutal të (trafostacionit v.j.) në Valaç, sistemeve tona energjetike dhe rrezikimin e furnizimit me energji. Populli serb asnjëherë nuk ka ikur nga përgjegjësitë e tij, por ne kemi kërkuar që kjo të bëhet në përputhje me marrëveshjen, përkatësisht të bëhet nga Elektrosever, që është simotër e EPS-it (Elektro Provreda Srbije)”, thuhet në njoftimin.
Tutje, në reagim thuhet se marrëveshja pamundëson “pagesën retroaktive” dhe se “Elektroserveri” do të ketë sistem energjetik në veri me garanci të Bashkimit Evropian.
“Theksojmë se do të punësohen të gjithë punëtorët e Elektrokosmetit në veri, si dhe planifikohet rekrutimi i punëtorëve të rinj në kompaninë e re, e me këtë edhe mbijetesa dhe qëndrimi në këto zona. Veçanërisht duhet theksuar se marrëveshja e sotme ka forcuar më drejtpërdrejt marrëveshjet e mëparshme nga viti 2013 dhe 2015, dhe në të njëjtën kohë ka hapur rrugën për biseda për Bashkësinë e Komunave Serbe”, thuhet tutje.
Ndryshe, serbët tash e 23 vjet nuk paguajnë për shpenzimet e bëra, e ato janë mbuluar nga Qeveria e Kosovës dhe taksapaguesve të saj.
Të martën u ra dakord për udhërrëfyesin për zbatim të Marrëveshjes mes Kosovës dhe Serbisë për çështjen e faturimit të rrymës në komunat veriore të Kosovës, e arritur më 2013./teve1.info/
