Në protestën e fundit që u mbajt ne sheshin kryesor “Car Llazar”, disa nga protestuesit akuzuan kreun e Serbisë se i ka tradhtuar ata, derisa kundërshtuan edhe formimin e Asociacionit të komunave me shumicë serbe.
Ndërkaq, Listën Serbe qytetarët serbë e cilësuan si një parti shantazhuese e kërcënuese.
Të tillë këtë parti sheh edhe politikania serbe Rada Trajkoviq. Madje, sipas saj, kjo parti ka kryer krime shumë të rënda.
“Lista Serbe gjatë këtyre viteve ka mbijetuar me dhunë, vrasje, djegie pasurie e shantazhe në punë, por me lirinë e popullit do ta humbë këtë, pra kur serbët të jenë të lirë, lista serbe do të zhduket”, tha Trajkoviq për Tëvë1.
Tutje, Trajkoviq është shprehur e shqetësuar që kjo parti ka bërë thirrje për kthimin e ushtrisë serbe ne Kosovë.
“Mendoj se shqetësime duhet të ketë sidomos me nismën e fundit për kthimin e ushtrisë, e cila ka filluar të duket si një fushatë kundër NATO-s. Një mesazh edhe për shqiptarët, për paqen mund të luftojmë vetëm së bashku. Çdo ide e fitores së njëanshme nuk do të sjell stabilitet”, shtoi ajo.
E publicisti nga Beogradi, Dushan Janjiq, thotë se qytetarët serbë që jetojnë në Kosovë kanë filluar ta humbasin besimin tek Lista Serbe.
Janjiq shprehet i bindur se ky është vetëm fillimi i rënies së kësaj partie.
“Lista Serbe ka monopolizuar përfaqësimin politik të serbëve të Kosovës për një kohë të gjatë, por tani po shohim një rënie të tyre për shkak se ka humbur besimi tek qytetarët. Në anën tjetër edhe largimi nga institucionet e Kosovës i ka dobësuar shumë. Unë shoh që në të ardhmen do të ketë edhe më shumë probleme për këtë parti, sepse qytetarët tashmë po kërkojnë alternativa të tjera dhe kjo është mirë për demokracinë”, u shpreh Janjiq.
Kujtojmë që gjatë muajit nëntor, zyrtarë të partisë më të madhe të serbëve në Kosovë vendosën t’i braktisin institucionet e vendit.
Kronika e gazetarit Shpat Blakçori.