Të gjithë kosovarët që janë ndaluar në kufi me Serbinë janë liruar.
Kështu bëjnë të ditur burimet e Tëvë1, derisa bëhet e ditur se të gjithë janë duke u kthyer për në Kosovë.
Ndërkohë, ende nuk ka informata për vendndodhjen e zëvendësdrejtorit të Policisë së Kosovës të nacionalitetit serb, Dejan Jankoviq.
Sipas informatave brenda institucioneve të sigurisë së Kosovës, Jankoviq, që vjen nga Komuna e Shtërpcës është ndaluar në pikën kufitare me Serbinë, Jarinjë, në veri të Kosovës, dhe është dërguar për intervistim në qytetin jugperëndimor të Serbisë, Rashkë.
Gjatë ditës së sotme, qindra kosovarë janë mbajtur të bllokuar për mbi 16 orë nga autoritetet serbe në pikat kufitare me Serbinë.
Serbia ka ndaluar autobusë me udhëtarë nga Kosova edhe në kufijtë me Kroacinë dhe Hungarinë, si shenjë hakmarrjeje ndaj mbështetjes nga Asambleja Parlamentare e Këshillit të Evropës për anëtarësimin e Kosovës në këtë organizatë.
Gjatë ditës, MPJD u ka bërë thirrje qytetarëve të vet që të shmangin “me çdo kusht” kalimin nëpër Serbi./teve1.info/
