Sulmuesi i krahut, Edon Zhegrova, megjithatë do t’i mungoj skuadrës së Lillet në ndeshjen e kthimit çerekfinale të Ligës së Konferencës ndaj Aston Villas.
Mungesën e Zhegrovës për këtë përballje, e ka konfirmuar trajneri i Lillet, Paulo Fonseca të mërkurën në konferencën për shtyp. Fonseca nuk ka dhënë detaje shtesë, por vetëm ka thënë se Zhegrova është në mesin e pesë futbollistëve që nuk do të jetë në dispozicion për duelin ndaj Aston Villas.
Megjithatë, Fonseca ka bërë të ditur se Zhegrova do të kthehet për ndeshjen kampionale kundër Strasbourgut që luhet këtë vikend.
Ndeshja e kthimit mes Lillet dhe Aston Villas, zhvillohet të enjten prej orës 18:45. Lille e ka humbur duelin e parë të zhvilluar në Angli javën e shkuar me rezultatin e ngushtë 2:1. E pikërisht në këtë ndeshje, Zhegrova e lëndoi nyjën e këmbës së majtë dhe u detyrua të zëvendësohet në minutën e 60-të.
Ai i ka munguar ekipit në disa stërvitje ditët e fundit dhe thuhej se pritej të ishte në bankën e rezervistëve për duelin e kthimit.
Mungesa e Zhegrovës do të jetë e madhe te Lille, duke pasur parasysh se 25-vjeçari është njëri prej lojtarëve kryesor të ekipit këtë edicion. Ai ka shënuar 11 gola dhe ka bërë 9 asistime në të gjitha garat deri më tani, ndërsa është shpallur edhe lojtari më i mirë për muajin mars në Ligue 1.
