Liga e Parë do të vazhdojë me xhiron e rregullt që do të luhet përgjatë dy ditëve të vikendit, ka njoftuar Federata e Futbollit të Kosovës (FFK), të enjten.
Në total, në këtë xhiro do të luhen nëntë përballje, ku katër prej tyre do të zhvillohen të shtunën dhe pesë tjera të dielën, por të gjitha do të stërtojnë nga ora 15:00.
Megjithatë, ndeshja kryesore e kësaj xhiroje do të zhvillohet të shtunën në Gjakovë, ku skuadra e Vëllaznimit e pret Lirinë e Prizrenit.
Të dy skuadrat po luftojnë për t’u kthyer në Superligë sezonin e ardhshëm dhe aktualisht renditen në pesë pozitat e para në tabelë.
Liria është e treta me 59 pikë, një më shumë se Vellaznimi që renditet në pozitën e pestë kurse lider është Dinamo me 62 pikë, i ndjekur nga Vushtrria me 60 pikë.
Të shtunën, do të luhen edhe duelet Ramiz Sadiku – Tefik Çanga, 2 Korriku – Feronikeli ’74 dhe Kika – Dinamo kurse xhiro do të mbyllet të dielën, me përballjet Trepça ’89 – Suhareka, Istogu – Vushtrria, Besa – Rilindja, Prizreni – KEK-u dhe Trepça – Vjosa.
