Turqia po përkujton nëntëvjetorin e përpjekjes së dështuar për grusht shteti më 15 korrik 2016, e orkestruar nga organizata e shpallur terroriste nga Turqia FETO.
Presidenti turk, Recep Tayyip Erdogan, do të marrë pjesë në një sërë aktivitetesh në kryeqytetin Ankara për të shënuar këtë ditë, e njohur zyrtarisht si Dita e Demokracisë dhe Unitetit Kombëtar.
Zëvendëspresidenti, Cevdet Yilmaz theksoi rëndësinë e kësaj dite, duke kujtuar se miliona qytetarë iu përgjigjën thirrjes së presidentit Erdogan dhe dolën në rrugë për të mbrojtur vullnetin e popullit.
Në një mesazh në X, ai nderoi kujtimin e dëshmorëve dhe veteranëve, duke u zotuar të ruajë trashëgiminë e tyre dhe të forcojë unitetin kombëtar në frymën e “Shekullit të Turqisë”.
Ministri i Jashtëm Hakan Fidan, në një postim në X, deklaroi se përpjekja për grusht shteti u pengua falë “largpamësisë” së Erdoganit dhe “vullnetit të palëkundur” të popullit turk.
“Ato rrjete tradhtie që synojnë ta gjunjëzojnë Turqinë, duke bashkëpunuar me agjencitë e huaja të inteligjencës, kanë nënvlerësuar seriozisht një fakt: angazhimin e palëkundur të kombit tonë për liri dhe drejtësi, si dhe forcën e shtetit tonë,” shkroi ai.
Fidan gjithashtu bëri të ditur se qeveria vazhdon të ndjekë anëtarët e FETO-s në gjithë botën dhe mbetet e vendosur t’i sjellë ata para drejtësisë. Ai i bëri homazh “martirëve heroikë” dhe shprehu mirënjohje për veteranët që iu kundërvunë puçistëve.
Drejtori i Komunikimit të Turqisë, Burhanettin Duran, ndau një mesazh në X, ku përshkroi grushtin e shtetit të dështuar si një simbol të “rezistencës heroike” dhe lavdëroi miliona njerëz që dolën në rrugë më 15 korrik 2016.
“Nuk mund ta shlyejmë kurrë plotësisht borxhin tonë ndaj dëshmorëve dhe veteranëve që rrezikuan gjithçka me trimëri të palëkundur”, tha ai. “Por ne do të vazhdojmë të përparojmë reformat historike që ata do të ishin krenarë t’i shihnin të përmbushura”.
Përpjekja e dështuar për grusht shteti, në të cilën u vranë 252 persona dhe u plagosën 2,734 të tjerë, u organizua dhe u krye nga Organizata Fetullah (FETO).
