Liderët evropianë i kanë mirëpritur përpjekjet e Trumpit për t’i ndalur vrasjet në Ukrainë, për t’i dhënë fund agresionit të Rusisë dhe për të arritur paqe të drejtë dhe të qëndrueshme.
Kështu është bërë e ditur në një deklaratë të përbashkët të publikuar nga Këshilli Evropian, pas takimit ndërmjet presidentit amerikan, Donald Trump dhe presidentit rus, Vladimir Putin në Alaskë, nga i cili nuk u arrit asnjë marrëveshje për armëpushim apo paqe.
Deklarata është nënshkruar nga presidenti francez, Emmanuel Macron, kryeministrja italiane, Giorgia Meloni, kancelari gjerman Friedrich Merz, kryeministri britanik, Keir Starmer, presidenti finlandez Alexander Stubb, kryeministri polak, Donald Tusk, presidenti i Këshillit Evropian António Costa dhe presidentja e Komisionit Evropian, Ursula von der Leyen.
Në deklaratë theksohet se, ashtu siç ka thënë vetë presidenti Trump, “nuk ka marrëveshje derisa të ketë marrëveshje”, dhe se hapi i ardhshëm duhet të jetë zhvillimi i bisedimeve të mëtejshme, me përfshirjen e presidentit ukrainas, Volodymyr Zelensky, të cilin Trumpi do ta takojë të hënën në Shtëpinë e Bardhë.
Liderët evropianë kanë shprehur gatishmërinë e tyre për të bashkëpunuar me Trumpin dhe Zelenskyn drejt një samiti trepalësh, ku do të marrë pjesë edhe presidenti rus, Vladimir Putin.
Ata kanë theksuar se Ukraina duhet të ketë garanci të forta dhe të pakundërshtueshme të sigurisë për ta mbrojtur sovranitetin dhe integritetin e saj territorial në mënyrë efektive.
“Ne mirëpresim deklaratën e Presidentit Trump se SHBA-të janë të gatshme të japin garanci sigurie. Koalicioni i të Vullnetshmëve është gati të luajë një rol aktiv. Nuk duhet të vendosen kufizime mbi forcat e armatosura të Ukrainës ose në bashkëpunimin e saj me vendet e treta. Rusia nuk mund të ketë veto kundër rrugës së Ukrainës drejt BE-së dhe NATO-s. Do të jetë në dorë të Ukrainës të marrë vendime në territorin e saj. Kufijtë ndërkombëtarë nuk duhet të ndryshohen me forcë. Mbështetja jonë për Ukrainën do të vazhdojë. Ne jemi të vendosur të bëjmë më shumë për ta mbajtur Ukrainën të fortë, me qëllim që të arrijmë fundin e luftimeve dhe një paqe të drejtë dhe të qëndrueshme. Për sa kohë që vrasjet në Ukrainë vazhdojnë, ne jemi të gatshëm të vazhdojmë presionin mbi Rusinë. Ne do të vazhdojmë të forcojmë sanksionet dhe masat më të gjera ekonomike për të ushtruar presion mbi ekonominë e luftës së Rusisë derisa të ketë një paqe të drejtë dhe të qëndrueshme. Ukraina mund të mbështetet në solidaritetin tonë të palëkundur ndërsa punojmë drejt një paqeje që mbron interesat jetësore të sigurisë së Ukrainës dhe të Evropës”, thuhet në deklaratën e Këshillit Evropian.
We welcome @POTUS diplomatic efforts to put an end to Russia’s war of aggression against Ukraine.
The killing must stop.
The European Union will continue engaged with @ZelenskyyUA and U.S. to achieve a just and lasting peace.https://t.co/q5EkyMnKk3
— António Costa (@eucopresident) August 16, 2025
