Sekretarja e Shtypit në Shtëpinë e Bardhë, Karoline Leavitt, ka deklaruar se Presidenti i Shteteve të Bashkuara, Donald Trump, ka ndërmjetësuar dhe ndalur gjashtë konflikte ndërkombëtare brenda gjashtë muajve të parë të mandatit të tij aktual presidencial.
Në një konferencë për media të mbajtur në Shtëpinë e Bardhë, Leavitt u shpreh:
“Presidenti ka përfunduar tashmë konfliktet midis Tajlandës dhe Kamboxhias, Izraelit dhe Iranit, Ruandës dhe Republikës Demokratike të Kongos, Indisë dhe Pakistanit, Serbisë dhe Kosovës, si dhe Egjiptit dhe Etiopisë.
Kjo do të thotë se Presidenti Trump ka ndërmjetësuar mesatarisht një marrëveshje paqeje ose armëpushim çdo muaj gjatë 6 muajve në detyrë.”
Kjo nuk është hera e parë që Shtëpia e Bardhë e përmend Kosovën. Presidenti Trump edhe më herët ka deklaruar interesin e tij për stabilitetin në Ballkan dhe për një marrëveshje afatgjate midis Kosovës dhe Serbisë.
Megjithëse ende nuk janë bërë publike detajet zyrtare të marrëveshjes së pretenduar ndërmjet Kosovës dhe Serbisë, kjo deklaratë ka ngjallur interes të madh në qarqet diplomatike dhe analitike ndërkombëtare.
