Për 12 vite e udhëhoqi komunën e Pejës.
Por në garën që u mbajt me 12 tetor Gazmend Muhaxherit iu rreziku karrigia e të parti të kësaj komune.
Kësisoj, ai shkoi në balotazh së bashku me kandidatin e Lëvizjes Vetëvendosjes, Taulant Kelmendin.
Mirëpo, përkundër balotazhit Gazmend Muhaxheri e fitoi garën, duke marrë 61.51% të votave, dhe duke lënë prapa tij Kelmendin e Vetëvendosjes, me 38.85%.
Veton Mujaj nga Organizata Syri i Vizionit ka disa arsye pse fitoi Muhaxheri në Pejë dhe pse humbi Taulant Kelemendi.
“..Nuk i ka pasur të gjitha informatat se çfarë duhet me prek qytetarin më shumë krahasuar me Gazmendin. Njëkohësisht gjithë këtë e bënë edhe rrjedhja e koalicioneve . Ne e dimë se gjatë gjithë udhëheqjes së Gazmendit ka qenë në koalicion me PDK-në dhe praktikisht PDK-ja e ka ndihmuar”, ka vlerësuar ai.
Të lumtur me këtë fitore të Muhaxherit u shprehën edhe disa qytetarë të Pejës.
“Kryetari ka qenë tash e sa vite në pushtet edhe ka qenë fitore e pritshme prej anës time, Peja dihet që është bastion i LDK-së, gara ka qenë ngushte, por gjithçka ka përfunduar ashtu siç është pritur”, ka thwnw Uran Pupovci.
“I kemi pritur shumë mirë pasi i kemi ditë që ka me fitu, kështu që kurfar befasi nuk ka, ai ka qenë favorit”, u shpreh Ali Dreshaj.
Madje për dikë u realizua edhe një dëshirë e kamotshme.
“Për mua ka qenë një plotësim i dëshire, në 2013, atëher e kam fol një fjalë kam than ky njeri ka me mbajt 20 vjet mandatin, dhe jam i lumtur që mu ka plotësu një dëshire”, u shpreh Azem Berisha.
Por ata kanë disa kërkesa ndaj tij.
“Me vazhdu projekte që i ka edhe me bo edhe më shumë edhe më mirë e sidomos me mendu pak edhe për të rinjtë”, tha Cufë Krasniqi.
“Ka bërë disa ndriçime sa i përket dritave ka Lumbardhir, por vetëm me drita nuk rregullohet infrastruktura, duhet me bo korzën deri atje poshtë, e shumë e shumë sene që na konvenojnë neve, e jo vetëm syrit”, tha Valon Mazreku.
E interesimi i pejanëve për të votuar dielën ishte me zbehur.
Sipas të dhënave të KQZ-së të drejtën për të votuar e kanë shfrytëzuar vetëm 32 mijë e 101 qytetarë apo 26.70% nga mbi 120 mijë të cilët kanë pasur të drejtë vote.
