Lidhja Demokratike e Kosovës, (LDK) ka reaguar ndaj një deklarate, të pushtetit për përparimin e Kosovës në indekset ndërkombëtare, për të cilën thonë se është propagandë.
Sipas kësaj partie, pushteti ka fshehur vitin 2023 për Raportin e BE-së dhe atë të World Justice Project, ku tregohet që Kosova ka ngecje.
“Propaganda e pushtetit e ka fshehur vitin 2023 për Raportin e BE-së dhe atë të World Justice Project ku Kosova ka ngecje. Raporti i Progresit i BE-së për Kosovën në vitin 2023 ishte më i keqi ndër vite”, thuhet në postimin e LDK-së në Facebook.
Më tej, ky subjekt, ka thënë se në indeksin Transparency International kundër korrupsionit, Kosova ka ngecur në 41 poena nga viti 2022.
“Në indeksin Transparency International kundër korrupsionit, Kosova ka ngecur në 41 poena nga viti 2022. Radhitja e shteteve në këtë indeks nuk tregon asgjë sepse vendet mund të ndryshojnë vend pa pasur asnjë përmirësim. 2014-2017, gjatë qeverisjes së LDK-së, Kosova u ngrit nga 33 poena në 39 poena në Transparency International. Pushteti aktual e mori mandatin me 39 poena dhe nuk e ngriti më shumë se 2”, thuhet po ashtu. /teve1.info/
