Deputetët e Lidhja Demokratike e Kosovës (LDK) janë mbledhur në selinë e partisë për të diskutuar çështjen e zgjedhjes së presidentit.
Ky takim vjen një orë pas përfundimit të takimit të tretë të kryetarit të LDK-së, Lumir Abdixhiku, me kryeministrin dhe njëherësh kryetarin e Lëvizja Vetëvendosje (LVV), Albin Kurti.
Deputeti i LDK-së, Anton Quni, tha se do të respektojë çdo vendim që merr kryesia e LDK-së për çështjen e presidentit, përfshirë edhe mundësinë për ta votuar për një mandat të dytë Vjosa Osmanin.
Quni tregon a do ta mbështesë për presidente Vjosa Osmanin.
“Prandaj po mbahet ky takim që t’i marrim informatat nga kryetari Abdixhiku…Do të diskutojmë dhe bëjmë debat dhe t’i marrim vendimet e duhura”, tha ai.
Edhe deputeti tjetër, Armend Zemaj, foli shkurt për media. Ai tha se ka shumë emra që do t’i rekomandonte për president nga radhët e LDK-së.
Zemaj theksoi se fillimisht ka votë për kandidatët e LDK-së për president, e më pas do të shohë përtej.
“Ka shumë emra në LDK që do t’i rekomandoja; ka shumë meritorë, prej të parit deri te i fundit e meritojnë. Unë kam votë për njerëzit e LDK-së, pastaj të shohim përtej”, tha ai.
Kurti e Abdixhiku janë takuar dhe të martën. As takimi i tretë mes tyre nuk solli ndonjë rezultat.
Kryeministri Albin Kurti, tha se takimi u zhvillua në atmosferë konstruktive, por qe tha ende nuk kanë zgjidhje për problemin./teve1.info/
