Ministri i Kulturës, Hajrullah Çeku ka bërë të ditur se me rastin e shënimit të kësaj dite, sot është prezantuar Programi Kombetar i Muzeve në Kosovë, që sipas tij është një nismë që fuqizon zhvillimin e institucioneve të muzeve.
“Sot ditën e filluam në Lapidariumin e Muzeut të Kosovës ku prezantuam Programin Kombëtar të Muzeve në Kosovë, një nismë që synon fuqizimin e institucioneve të muzeve dhe zhvillimin e një vizioni të përbashkët për ruajtjen, interpretimin dhe promovimin e veprimtarisë krijuese nga e kalura si dhe edukimin e gjeneratave të reja për rolin e tyre”, tha ai.
Çeku në Facebook ka theksuar se si hap i parë ka filluar rregullimi i bazës ligjore në fushën e kulturës, ku përfshihen dhe trajtohen edhe muzetë.
“Në këtë kontekst, së bashku me ekipin punues të profesionistëve nga kjo fushë, kemi filluar me studimin e gjendjes ekzistuese të fushës së muzeve në Kosovë. Pas përfundimit të këtij studimi, së bashku do të përcaktohemi për vizionin e institucioneve të muzeve tona, për të sjellur ndryshime pozitive në shoqëri”, shtoi tutje ai.
Kurse sipas tij gjatë këtij viti do të fillohet me hapat për inventarizim të fondit muzeal i cili gjendet në muzetë e Kosovës, me qëllim që siç tha ai secili artefakt e objekt i cili gjendet në koleksionet e muzeve, të jetë i dokumentuar dhe i regjistruar në Bazën e të dhënave të trashëgimisë kulturore.
