Kryetari i zgjedhur i Zubin Potokut, Izmir Zeqiri ka folur për pamundësinë e qasjes në objektin e komunës, shkaku që ai objekt ende po kontrollohet nga Lista Serbe.
Zeqiri ka thënë se në këtë komunë janë disa objekte ku administrata mund ta ushtrojë veprimtarinë e vet.
“Neve qysh nga fillimi, qysh nga paslufta kemi themeluar disa institucione në shërbime të qytetarit sidomos duke u nisur nga Zyrat e Regjistrmit Civil që kanë funksionuar prej asaj kohe e deri më tani, kemi zyre komunale për komunitete e që vet jam një zyrtar që punoj për këto zyre, drejtoria për çështje sociale është e stacionuar këtu, një zyre e policisë lokale, i kemi edhe disa zyre të zbrazuara të gatshme për funksionim”, ka thënë Zeqiri.
Më tej, ai ka thënë se në këtë kohë nuk e ka prioritet që t’i marrë të gjitha objektet.
“Unë fillimisht do të filloj punën, nuk e kam prioritet për të marrë të gjitha objektet për shkak që një pjesë të tyre veprojnë edhe punojnë dhe kemi hapësira. Do të përpiqem që ta ndërtoj një kabinet shumë të mirë, funksional e të hapur për të gjithë. Tani e tutje do të përpiqemi t’i themelojmë këto organe. Fillimisht do t’i konsolidojmë radhët. Për momentin kemi objekte për ku mund të operojmë dhe mendoj pikësëpari të themelojmë kabinetin e kryetarit”, ka thënë Zeqiri.
