Xani tha se deri tek finalizimi i liberalizimit të vizave janë edhe 5 apo 6 hapa tjerë.
“Nga sot jemi një shkallë më afër liberalizimit të vizave, mirëpo deri te finalizimi i këtij procesi janë edhe 5 apo 6 hapa tjerë. Fat i mirë është që nuk do kemi pengesë nga ndonjë shtet. Tanimë kemi një proces që hartat veç janë të vizatuara. Gjithashtu, nuk presim ndonjë vendim negativ deri në janar të vitit 2024. Liberalizimi i vizave kurrë më afër s’ka qenë, po përsëri nuk e kemi të garantuar”, deklaroi Xani në emisionin “Ditari” në tëvë1.
I pyetur se a ka mundësi që të zgjatet procedura në hapat e ardhshëm, Xani tha se kjo varet krejt nga proceset e Bashkimit Evropian, Parlamentit Evropian, ambasadorëve e Këshillit të ministrave.
“Nuk ka arsye për ndalesë, që kjo gjë sot veç u konfirmua, për shkak se ata janë grup profesionist që i bëjnë të gjitha vlerësimet dhe të gjitha skanimet e gjendjes. Gjithsesi, këtu nuk konsideroj që do ketë pengesa, pasi vështirësitë kanë qenë të jepet drita e gjelbër dhe një datë. Ne sot e kemi datën edhe pse duket e largët”, theksoi ai tutje.
Më tej, Xani tha se në qoftë se do shfaqen probleme në të ardhmen, atëherë do humbet shpresa totale që do ketë ndonjëherë liberalizim të vizave për Kosovën.
Përfaqësues të vendeve anëtare të Bashkimit Evropian sot janë pajtuar me propozimin që liberalizimi i vizave për Kosovën të hyjë në fuqi më 1 janar të vitit 2024. E për këtë Xani tha se kjo datë mund të shtyhet vetëm nëse do ketë ndërhyrje të shteteve të cilat me qëllim dëshirojnë që Kosova të mbetet e izoluar./teve1.info./