E enjtja në Mitrovicën e Veriut ishte ditë e qetë. Edhe pse në qytetin me shumicë serbe u paralajmërua nga kryeministri Albin Kurti se do të organizohej një protestë të premten, shkaku që nuk u lejua mbajtja e zgjedhjeve të Serbisë në Kosovë, situata atje ishte e zakonshme.
Teksa shumica e qytetarëve nuk ishin në njohuri se do të kishte protestë.
As nga kampi shqiptar në Mitrovicën e Veriut nuk kanë informacione se të premten do të protestohet në veri.
Asamblisti shqiptar Skender Sadiku thotë se informacionin e ka marrë nga mediat.
“Realisht këtë informacion e kam marrë prej medieve edhe unë. Nuk ka në Mitrovicën e e Veriut ndonjë pankartë apo thirrje publike për protestë. Po e drejta e protestës është e drejtë universale kështu që shpresoj që mos ta humbim rastin nesër se duhet të dalim të gjitha komunitetet, të gjithë qytetarët që të protestojmë për çështje të ndryshme”, ka thënë Sadiku.
Zhvillimet e fundit me moslejimin e Serbisë që të mbajë zgjedhje në Kosovë, sipas analistit Nexhmedin Spahiu janë tentim që të detyrohet Serbia ta njoh Kosovën.
“Sigurisht që do të ketë protesta por nuk do të ketë gjë prej protestës. Do të protestohet, do të kryhet protesta dhe asgjë më tepër. Mendoj që vendimi për moslejimin e mbajtjes së zgjedhjeve në terren pa nj dakordim paraprak me Qeverinë e Serbisë ka qenë një veprim i mençur i kryeministrit dhe një tentim me shti Serbinë me njoftë Kosovën”, ka thënë Sadiku.
Televizioni Tëvë 1 provoi që të kontaktojë edhe me policinë për protestën e paralajmëruar, por nga stacioni i Mitrovicës së Veriut nuk u përgjigjën gjatë së enjtes.
Raporti i gazetarit Gojart Jashari.
