Është nga urat më të larta në Liqenin e Ujmanit.
E së fundmi, kërcimi nga kjo urë i kushtoi rëndë dy qytetarëve.
Në vitin 2024, një person u lëndua rëndë teksa kërceu nga kjo urë.
Por, më së keqi e pësoi të dielën një mërgimtar nga Suedia.
Ky i fundit pas kërcimit nga ura, nuk arriti të dalë më mbi sipërfaqen e ujit.
Pavarësisht kësaj, këtu nuk shihet asnjë shenjë që e ndalon kërcimin.
“Kemi biseduar me zyrtarët e Ibër-Lepencit dhe ta dimë a janë kompetent për vendosjen e sinjalistikës apo Komuna e Zubin Potokut. Unë e konsideroj që Ibër-Lepenci duhet ta kryej këtë punë që ta vendos sinjalisitkën”, ka thënë zëvendësdrejtori i Policisë për rajonin e veriut, Veton Elshani për Tëvë1.
Por, kryeshefi i ndërmarrjes “Ibër-Lepenc”, Faruk Mujka thotë se nuk është kompetencë e ndërmarrjes që të vendosë për shenjat në rrugë.
“Nuk ka pasur shenja. Ato normalisht duhet të koordinohen, unë nuk vendosi shenja. Duhet me u thirr në ndonjë ligj që të vendosen shenja. Sa i përket infrastrukturës, sa i përket Ibër Lepencit në digë, në kanal edhe në central shenjat janë. Tash unë nuk mund të vendosi shenja nëpër ura, nëpër krejt autostradën që kalon ka liqeni… Unë nuk mund t’i vendosi vet këto gjëra, normalisht që duhet të kemi koordinim jo vetëm me Ministrinë e Punëve të Brendshme, sepse këtu ngërthehen shumë gjëra. Është Ministria e Mjedisit dhe Planifikimit Hapësinor, është liqeni. Ende statusi i liqenit nuk është i definuar a është uji për pije, sepse uji i liqenit të Ujmanit përdoret për pije. I ka disa kufizime të caktuara, është pak një operacion që kërkon ndërthurje të shumë ministrive”, ka thënë Mujka.
Jetike vendosjen e shenjave në vendet e tilla me rrezikshmëri të lartë, e konsiderojnë në Shoqatën e Kosovës për Kërkim – Shpëtim.
“Besoj që duhet të ketë paralajmërime të rrezikshmërisë, sepse në vende të tilla nëse nuk ka shenja të rrezikshmërisë, është njëjtë si në komunikacion të mos ketë shenja, atëherë vozitja do të ishte e çmendur”, ka thënë Mentor Maloku.
Ai tregon se sa janë të rrezikshme kërcimet në ujë nga lartësitë e tilla.
“Kërcimet e tilla janë të barabarta me vdekjen për shkak se këto kërcime janë për profesionist, madje edhe profesionistët vdesin në raste të tilla. Shembull, e kemi pasur kërcyesin profesionist që ka vdekur në Urën e Mostarit në Sarajevë. Uji në liqene është me shtresa, në fillim është i nxehtë por më poshtë është shtresa e ftohtë e ujit”, shprehet ai.
Të mërkurën edhe Instituti i Kosovës për Drejtësi ka kërkuar llogari institucionale për vdekjen tragjike të mërgimtarit në Ujman.
Varrimi i këtij të fundit, është bërë mesditën e së mërkurës në varrezat e Shipolit në Mitrovicë.
