Për herë të parë, një aplikacion i Inteligjencës Artificiale ka arritur të kryesojë listën e shkarkimeve në Evropë.
Bëhet fjalë për ChatGPT-në, i cili deri në vitin 2025 është shkarkuar rreth 64 milionë herë, sipas të dhënave të firmës AppFigures.
Ky tregues tregon se Inteligjenca Artificiale po transformohet nga një “lodër teknologjike” në një mjet i përdorur çdo ditë për shkrim, përmbledhje, përkthim apo thjesht për të punuar më shpejt.
Pas ChatGPT-së, në renditjen e aplikacioneve më të përdorura gjejnë vend: Temu (platforma online e tregtisë), Vinted (aplikacioni i tregtisë së përdorur), Lidl Plus (aplikacioni i zbritjeve të dyqanit gjerman) dhe rrjetet sociale TikTok dhe Instagram.
Të gjithë këto aplikacione janë relativisht të thjeshta dhe shpesh falas, dhe përdoren automatikisht nga përdoruesit, qoftë për të bërë blerje apo thjesht për të shfletuar.
Përdorimi dhe fitimet e aplikacioneve
Renditja e aplikacioneve më fitimprurëse është disi tjetër. TikTok kryeson me një të ardhur të parashikuar prej 740 milionë euro në 2025, ndërsa ChatGPT-i renditet i dyti falë abonimeve të tij.
Aplikacionet për takime gjithashtu janë ndër më fitimprurësit.
Këto të dhëna tregojnë se, ndonëse shumica e njerëzve përdorin aplikacionet për të thjeshtuar jetën e tyre dhe për të kursyer kohë, aplikacionet më fitimprurëse janë pikërisht ato që kërkojnë më shumë kohë nga përdoruesit.
Në terma të thjeshtë: dobia udhëheq shkarkimet, por vëmendja mbetet forca kryesore e ekonomisë digjitale.
