Sot, nënkryetarja e Kuvendit të Republikës së Kosovës, Albulena Haxhiu, së bashku me presidenten Vjosa Osmani, Kryeministrim Albin Kurti, deputetë të Kuvendit të Kosovës dhe anëtarë të kabinetit qeveritar, kanë bërë homazhe pranë shtatores së Komandantit Zahir Pajaziti në Prishtinë
Në njoftimin e Kuvendit thuhet se Zahir Pajaziti ishte ndër ideatorët dhe organizatorët e parë të UÇK-së, me rol vendimtar në ndërtimin e celulave të para të rezistencës dhe në konsolidimin e frymës çlirimtare.
“Sakrifica e tij, së bashku me Hakif Zejnullahun dhe Edmond Hoxhën, përfaqëson një kapitull themelor të historisë sonë më të re dhe dëshmon se liria e Kosovës është ndërtuar mbi guxim, vizion dhe flijim të vetëdijshëm”, thuhet në njoftim.
Ndryshe, Kuvendi i Kosovës ka nderuar me respekt jetën dhe veprën e heronjve, dëshmorëve dhe martirëve të popullit të Kosovës, duke riafirmuar përkushtimin institucional për ruajtjen e vlerave të luftës çlirimtare dhe shtetndërtimit./teve1.info/
