Autori: Driton Sadiku
Gjykata Kushtetuese shpeshherë është vendosur në qendër të zhvillimeve politike.
Vendimet e saj jo rrallë kanë shërbyer si orientim për partitë se si të veprojnë në situata të ndërlikuara institucionale.
Së fundmi, organit më të lartë juridik në vend i është kërkuar sërish të japë sqarim nëse Kuvendi duhet të shpërndahet apo nëse duhet të vazhdohet me afatet për zgjedhjen e presidentit.
Shumë nga temat që Kushtetuesja i ka trajtuar përgjatë muajve të fundit të krizave politike, juristët vlerësojnë se do të duhej të zgjidheshin përmes marrëveshjeve politike.
Gjykata, sipas Melos Kolshit nga IKD, nuk duhet parë si instrument që zgjidh mospajtimet politike.
“Institucione tashmë e kanë bërë praktikë rrugën drejtë gjykatës kushtetuese që për çdo problem të cilin ata vetë e sajojnë. Gjykata kushtetuese mos të shfrytëzohet e të shihet si një instrument ku partitë politike gjejnë mbështetjen dhe e shfrytëzojnë si një instrument mbi të cilin mund të kalkulojnë politikisht”, ka thënë Kolshi.
Megjithatë, Gjykata sipas avokatit Ardian Bajraktari, e ka detyrim ligjor që t’i trajtoj të gjitha lëndër të cilat i drejtohen asaj.
“Për aq kohë sa është në kuadër të kompetencave që është në shqyrtim nga gjykata kushtetuese atëherë ka detyrim kushtetues dhe ligjor që t’i trajtoj këto çështje dhe po shpresoj që kjo të trajtohet brenda një afati sa më të shkurtër”, u shpreh Bajraktari.
Gjykata Kushtetuese shqyrtoi plot gjashtë lëndë të deponuara nga legjislatura e nëntë, e cila për më shumë se gjashtë muaj nuk arriti të konstituohej.
