Kryeministri i Kosovës, Albin Kurti, u mirëprit në një takim në New York nga zëvendëskryeministri dhe Ministri i Punëve të Jashtme të Emirateve të Bashkuara Arabe, Abdullah bin Zayed bin Sultan Al Nahyan.
Përgjatë bashkëbisedimit, Kurti i ka falënderuar Emiratet e Bashkuara Arabe për mbështetjen e vazhdueshme ndaj Kosovës.
Tutje, ata kanë diskutuar mbi fuqizimin e bashkëpunimit dhe rritjen e marrëdhënieve ekonomike mes dy vendeve.
Derisa, kryeministri theksoi avantazhet që ofron Kosova si destinacion i përshtatshëm dhe i volitshëm për investime dhe ambientin e të bërit biznes, duke i ftuar kompanitë që të vijnë ta njohin më gjerë vendin tonë e të investojnë në fusha me interes të përbashkët.
“Ai e njohu zëvendëskryeministrin e njëherësh Ministrin e Punëve të Jashtme, Abdullah bin Zayed bin Sultan Al Nahyan, edhe me përpjekjet e avancimin e shtetit tonë drejt energjisë së gjelbër e të ripërtërishtme, veçanërisht ankandin e suksesshëm të zhvilluar e ato të ardhshme që priten këtë vit, si një mundësi e mirë për investitorët”, thuhet në komunikatën e Zyrës së Qeverisë./teve1.info/
