Kryeministri në detyrë i Kosovës, Albin Kurti, gjatë vizitës së tij në kryeqytetin amerikan, ka takuar kongresisten republikane nga shteti i Floridës, Kat Cammack.
Sipas njoftimit zyrtar, në takim është diskutuar për bashkëpunimin në fushën e mbrojtjes ndërmjet Kosovës dhe Shteteve të Bashkuara të Amerikës.
Në veçanti, është përmendur misioni bashkëzbarkues i Forcës së Sigurisë së Kosovës me ushtrinë amerikane në Kuvajt, si dhe pjesëmarrja e Kosovës për të tretën herë radhazi si vend mikpritës në ushtrimin e madh ushtarak “Defender Europe 25”, i udhëhequr nga SHBA-ja, ku morën pjesë 25 mijë ushtarakë nga 29 vende aleate dhe partnere.
Gjithashtu, një tjetër temë e diskutimit ka qenë bashkëpunimi ekonomik dhe tregtar.
“Me këtë rast, kryeministri theksoi vendimin e Qeverisë së Kosovës për largimin e tarifës doganore ndaj të gjitha produkteve me origjinë nga ShBA-ja, për çka kongresistja Cammack e falënderoi, dhe për investimet e mëdha infrastrukturore në vend në kuadër të Lojërave Mesdhetare 2030, të cilat paraqesin një mundësi të mirë edhe për kompanitë amerikane”, thuhet në njoftim.
Në takim, Kurti dhe kongresistja Cammack diskutuan edhe për rrezikun e vazhdueshëm që paraqet Rusia ndaj paqes dhe sigurisë rajonale dhe globale./teve1.info/
