Kryeministri në detyrë i Kosovës, Albin Kurti, ka zhvilluar një takim me Përfaqësuesen e Lartë të Bashkimi Evropian për Punë të Jashtme dhe Politikë të Sigurisë, njëherësh Zëvendëspresidente e Komisionit Evropian, Kaja Kallas, në margjina të Samiti i Komunitetit Politik Evropian (EPC).
Sipas Zyrës së Kryeministrit, gjatë takimit u diskutua për situatën politike në rajon dhe çështjet e sigurisë, në kuadër të sfidave ndërkombëtare gjithnjë e më të ndërlidhura.
Kurti ka theksuar rëndësinë e linjëzimit me BE-në në adresimin e këtyre sfidave, si dhe në avancimin e integrimit evropian të Kosovës.
Ai ka rikonfirmuar përkushtimin për agjendën e reformave dhe kërkesën për marrjen e statusit të vendit kandidat për anëtarësim në BE, duke vënë në pah progresin e arritur dhe nevojën për trajtim të drejtë, të bazuar në meritë.
Në takim u trajtuan edhe zhvillimet e fundit politike në vend, përfshirë zbatimin e ligjit për të huajt dhe dakordimin e datës 14 mars, e cila u cilësua si një momentum i ri pozitiv për rrugën përpara.
Po ashtu, pjesë e diskutimeve ishte edhe procesi i dialogut ndërmjet Kosova dhe Serbia, si dhe çështja e shqiptarëve në Preshevë, Medvegjë dhe Bujanoc.
Kurti ka ngritur shqetësimet për pasivizimin e adresave dhe mungesën e mbështetjes financiare për Luginën.
“Takimi u zhvillua në një frymë konstruktive dhe shërbeu për shkëmbim të hapur të pikëpamjeve mbi temat me interes të përbashkët, duke riafirmuar rëndësinë e vazhdimit të komunikimit të afërt dhe bashkëpunimit të ngushtë ndërmjet institucioneve shtetërore të Kosovës dhe Bashkimit Evropian”, theksohet në fund të komunikatës./teve1.info/
