Kryeministri i Kosovës, Albin Kurti, ka thënë se sulmi terrorist në Banjskë më 24 shtator është organizuar nga Klani i Novi Sadit, në krye të së cilit ndodhet ministri i Mbrojtjes së Serbisë, Millosh Vuçeviq.
Kurti përmes një postimi në Facebook, ka thënë se më 24 shtator në Manastirin e Banjskës ndodheshin 40 pelegrinë ortodoks nga Novi Sadi, që sipas tij, hetimet duhet të tregojnë nëse ishe rastësi.
“Sulmin paramilitar e terrorist në Banjskë të Zveçanit e ka organizuar Klani i Novi Sadit. Në krye të tij ndodhet Ministri i Mbrojtjes së Serbisë, Millosh Vuçeviq. Ai është kryetari i partisë-shtet SNS, tri herë i zgjedhur kryebashkiak i Novi Sadit me ndihmën e Zvonko Veselinoviqit, dhe miku më i afërt i vëllaut të Presidentit të Serbisë, Andrej Vuçiq. Rreth 40 pelegrinë ortodoksë në Manastir të Banjskës me 24 shtator ishin nga Novi Sadi. Ndoshta e rastësishme, hetimet duhet ta tregojnë”, ka shkruar Kurti, në Facebook, përcjell teve1.info
Ai ka thënë se grupi terrorist që kreu sulmin po qëndron në Rashkë.
“Grupi terrorist në arrati i udhëhequr nga Millan Radoiçiq po qëndron në Rashkë. Atyre MUP-i famëkeq serb iu ka ndarë vetura të tipit Shkoda Oktavia me ngjyrë të bardhë dhe të zezë e me tabela regjistrimi BG dhe… NS.Para dy dekadave në Serbi sundonte Klani i Zemunit, kurse tash vendin atij ia ka zënë Klani i Novi Sadit. Kriminelë në luftë, kriminelë në paqe; kriminelë në Serbi, kriminelë në Kosovë. Presidenti i shtetit, Aleksandar Vuçiq, porsi një capo-di-tutti-capi, ndodhet aty për të dëshmuar që ndonëse krimi e dikton shtetin, në fakt, është shteti që e dikton krimin”, ka shkruar kryeministri.
Ai ka thënë se kriminaliteti në katër komunat në veri të Kosovës po merr fund. Kurti ka thënë se Kosova nuk ka juridiksion në Serbi, duke shtuar pyetje nëse BE e SHBA do duhej ta formimin një Gjykatë Speciale për Klanin e Novi Sadit.
“Në katër komunat veriore të Kosovës po merr fund terrori, kriminaliteti dhe kultura e dhunës e paramilitarëve të Delije (tifozët e Cërvena Zvezdës) që shprehet me nofkat e ekstremistëve si: Mami, Llune, Daco, Rusi, Nemac, Gile, Drago, Aco, Comi, Belli, Micko, Prki, Mrki etj.Mirëpo, Kosova nuk ka jurisdiksion në Serbi. A nuk do të duhej që BE-ja dhe ShBA-të ta formojnë një Gjykatë Speciale për Klanin e Novi Sadit? Mafia ballkanike do të përjetonte goditje fatale, ndërkaq rajoni i Ballkanit do të hapej i tëri për demokraci evropiane, drejtësi ligjore, paqe të qëndrueshme dhe zhvillim të përshpejtuar”, është shprehur Kurti.
Kosova ka kërkuar hetim ndërkombëtar për sulmin e 24 shtatorit, ku një polic i Kosovës mbeti i vrarë.
