Kryeministri i Kosovës, Albin Kurti, njoftoi se ka dorëzuar një dokument tek përfaqësuesi i Lartë i Bashkimit Evropian, Josep Borrell dhe te i dërguari i Posaçëm i Bashkimit Evropian për dialogun Kosovë-Serbi, Miroslav Lajçak, mbi atë se si Beogradi zyrtar i ka shkelur 8 nene nga marrëveshja bazë e 27 shkurtit.
Në një prononcim për media pas takimit me presidentin e Serbisë, Aleksandar Vuçiq, kryeministri Kurti bëri të ditur se ka dorëzuar edhe një dokument me tri deklarata të Vuçiq, ku ai ka mohuar marrëveshjen bazë në Bruksel.
“Dorëzova tek ndërmjetësit edhe një dokument mbi atë se si nga 27 shkurti kur jemi pajtuar për marrëveshjen bazë, Beogradi e ka shkelur atë. Nga ai dokument shihet qartë, në mënyrë faktive, nga 11 nene të marrëveshjes bazë, 8 prej tyre i ka shkelur Beogradi Zyrtar. Pra, vetëm në muajt mars e prill, janë shkelur 8 nene. Gjithashtu, kam dorëzuar një dokument ku janë tri deklarata të presidentit të Serbisë, Aleksandar Vuçiq, se si ai thotë që nuk është pajtuar me marrëveshjen bazë, se si nuk do ta zbatojë atë në tërësi. Andaj, unë kisha nevojë për garancion që kemi soliditet të procesit, meqenëse kemi marrëveshje dhe kemi siguri ne si palë. Kjo mu tha qartazi nga Borrell e Lajçak që kemi marrëveshje dhe 27 shkurti në Bruksel dhe 18 marsi në Ohër, kanë ndodhur njëmend”, deklaroi Kurti./teve1.info/.
