Kryeministri i Kosovës, Albin Kurti ka përkujtuar 26-vjetorin e Epopesë së lavdishme të Dukagjinit, duke thënë se bashkë me guximin e familjes Haradinaj, qëndresa në Gllogjan i dha Serbisë mesazhin e fuqishëm se kulla nuk gjunjëzohet dhe Kosova nuk nënshtrohet.
Kurti në një postim në Facebook ka kujtuar dëshmorët e Epopesë së Dukagjinit, Gazmend Mehmetaj, Himë Haradinaj dhe Agron Mehmetaj,Kurti tha se sakrifica e tyre nderohet çdo ditë me respektin më të lartë.
“Duke kujtuar Ushtrinë Çlirimtare të Kosovës, po e zhvillojmë Forcën e Sigurisë së Kosovës. 26 vite më vonë, ushtrinë e shtetit e kemi më të fuqishme e më të pajisur, më të përgatitur e më të madhe se asnjëherë më parë. Krahas rritjes së buxhetit, shtimit të investimeve në armatim, sivjet ushtrisë sonë do t’i bashkohen edhe 600 rekrutë të rinj. Ideali i dëshmorëve, përparimi i vendit dhe liria e popullit po jetësohet dhe po jetohet për çdo ditë. I përjetshëm qoftë kujtimi për të gjithë të rënët për çlirimin e Kosovës,” ka shkruar Kurti./teve1.info/
