Kryeministri në detyrë, Albin Kurti, të premten ka pritur në takim lamtumirës ambasadorin e Italisë në Kosovë, Antonello De Riu.
Në komunikatë thuhet se Kurti ka shprehur vlerësimin për angazhimin e De Riut në thellimin e marrëdhënieve dypalëshe gjatë mandatit të tij si ambasador në Kosovë.
“Përgjatë bisedës, bashkë reflektuan mbi rezultatet dhe projektet dypalëshe si ai i zbatimit të marrëveshjes së patentë shoferëve Kosovë-Itali, promovimi i turizmit në Kosovë, kontributi i Italisë në sigurinë e vendit përmes pranisë së trupave të KFOR-it, mbështetja për bashkëpunimet në bujqësi, nisma të rëndësishme në fushën e kulturës dhe arsimit, ku është vërejtur rritje e interesimit të studentëve nga Kosova për studime në Itali”, thuhet në komunikatën e Zyrës së Kryeministrit.
Po ashtu thuhet se Kurti e ka falënderuar ambasadorin për mbështetjen e tij dhe të shtetit të Italisë ndaj Kosovës, si dhe i ka uruar suksese në angazhimet dhe detyrat e tij të radhës.
