Kryeministri i Kosovës, Albin Kurti, ka paralajmëruar se sonte pritet të jetë një natë kritike për qarkullimin rrugor në të gjithë vendin, për shkak të uljes së theksuar të temperaturave dhe rrezikut nga ngricat.
Në një postim në Facebook, Kurti ka bërë të ditur se temperaturat pritet të zbresin deri në –9 gradë Celsius, ndërsa rrugët e lagura nga reshjet e shiut mund të ngrijnë, duke rritur rrezikun për aksidente.
“Sonte është natë kritike sa i përket qarkullimit në rrugët e Kosovës. Kontrasti i madh i temperaturave paraqet rrezik të shtuar, pasi rrugët e lagura nga shiu pritet të ngrijnë”, ka shkruar Kurti.
Ai ka bërë të ditur se kompanitë e mirëmbajtjes së rrugëve janë vazhdimisht në terren, ndërsa ka theksuar domosdoshmërinë e zbatimit të ligjit për sezonin dimëror, përfshirë pajisjen e automjeteve me goma dimërore dhe zinxhirë.
Kryeministri u ka bërë thirrje qytetarëve që të shmangin lëvizjet e panevojshme gjatë natës, ndërsa ata që detyrohen të qarkullojnë, t’i përshtaten kushteve atmosferike dhe të vozitin me kujdes të shtuar.
“Ne po bëjmë maksimumin për t’ju dalë në ndihmë, andaj ju lutemi të kontribuoni në rritjen e sigurisë duke shmangur lëvizjet e panevojshme”, ka përfunduar Kurti.
