Kryeministri i Kosovës, Albin Kurti ka theksuar se Kushtetuta e Kosovës mbetet baza juridike që garanton funksionimin demokratik të institucioneve, në shërbim të qytetarëve dhe interesit publik.
Në një postim në Facebook, me rastin e Ditës së Kushtetutës, Kurti ka rikujtuar rëndësinë e aktit më të lartë juridik në vend, duke e cilësuar atë si themelin që normon vullnetin dhe të drejtat e qytetarëve për një shtet të pavarur, demokratik dhe të barabartë.
“Sot, në Ditën e Kushtetutës, rikujtojmë aktin themeltar normon vullnetin dhe të drejtat e qytetarëve për një shtet të pavarur e të lirë, demokratik dhe të barabartë. Kushtetuta e Republikës së Kosovës është baza juridike e institucioneve tona, që garanton funksionimin e tyre demokratik për të mirën e qytetarëve të Republikës, në shërbim të interesit publik dhe në frymën e sovranitetit shtetëror”, ka shkruar Kurti.
Sipas tij, Kushtetuta orienton vendimmarrjen politike dhe përcakton standardet e veprimeve, duke kërkuar përkushtim të vazhdueshëm nga institucionet dhe zyrtarët publikë për të vepruar me integritet, maturi dhe besnikëri ndaj rendit kushtetues.
“Në çdo rrethanë, ajo kërkon përkushtim të vazhdueshëm nga të gjithë mekanizmat dhe bartësit e përgjegjësive zyrtare, që në ushtrimin e mandatit të tyre të qëndrojnë me integritet, të sjellen me maturi dhe të tregojnë besnikëri ndaj kushtetutshmërisë”, ka shtuar ai.
Kurti ka theksuar gjithashtu rëndësinë e institucioneve që interpretojnë normën kushtetuese, duke i cilësuar ato thelbësore për ruajtjen e ekuilibrave të pushteteve dhe besimin e qytetarëve.
Në fund, ai ka riafirmuar angazhimin për përgjegjësi të lartë shtetërore dhe qytetare, duke e parë këtë si garanci për paqe, demokraci, drejtësi dhe siguri në të tashmen dhe të ardhmen evropiane të vendit.
