Kryeministri i Kosovës, Albin Kurti ka ngushëlluar familjarët e gazetarit dhe regjisorit slloven, Iztok Tory për vdekjen e tij.
I pari i qeverisë ka thënë se guximi dhe profesionalizmi i regjisorit slloven për dokumentimin e grevës së minatorëve të Trepçës, përçoi fuqishëm rezistencën politike të popullit shqiptar.
Madje, ai tha se Kosova do t`i jetë mirënjohëse Toryt për kontributin e tij për të vërtetën.
“Me ndjesi pikëllimi e mora lajmin për vdekjen e gazetarit dhe regjisorit slloven Iztok Tory. Në dhjetë ditë e fundit të shkurtit të vitit 1989, kur minatorët e Trepçës ishin në grevë në horizontet e zgafellës së Xeherores së Stantërgut, Iztok Tory ishte i pari që i transmetoi pamjet e tyre në TV Sllovenia. Guximi dhe profesionalizmi i Iztok Toryt, për dokumentimin e grevës së minatorëve të Trepçës, përçoi fuqishëm rezistencën politike të popullit shqiptar, në tërë Jugosllavinë, duke e tronditur opinionin publik. Libri i gazetarit Iztok Tory, “Zogjtë në Kosovë”, është një dëshmi dokumentare me vlerë historike për ngjarjet në Kosovën e vitit 1989. Kosova do t’i jetë mirënjohëse përgjithmonë për këtë kontribut të tij për të vërtetën”, ka shkruar kryeministri në Facebook./teve1.info/
