Gjatë këtij takimi, është diskutuar për dialogun me Serbinë pas agresionit rus në Ukrainë, si dhe për thellimin e raporteve mes Kosovës dhe Greqisë.
“Në takimin mes Kryeministrit të Republikës së Kosovës, Albin Kurti dhe shefes së Zyrës Ndërlidhëse Greke, ambasadores Chryssoula Aliferi, u diskutua për raportet mes Republikës së Kosovës dhe Republikës së Greqisë dhe vullnetin e të dyja palëve për thellimin e tyre. Në takim u diskutua edhe për situatën në rajon dhe dialogun me Serbinë, nën hijen e agresionit ushtarak të Federatës Ruse në Ukrainë, i cili paraqet rrezik edhe për rajonin tonë, duke pasur parasysh ndikimin malinj të Federatës Ruse nëpërmjet partneritetit të tyre me Serbinë”, thuhet ndër tjerash në njoftimin e Kryeministrisë.
Ndërkaq, ambasadorja greke e ka shprehur vlerësimin e shtetit grek për rreshtimin e Kosovës me vendet tjera demokratike në mbështetje të pavarësisë dhe sovranitetit të Ukrainës.
“Znj. Aliferi shprehu vlerësimin e palës greke për rreshtimin e menjëhershëm të Republikës së Kosovës me vendet e tjera demokratike, në mbështetje të pavarësisë, sovranitetit dhe integritetit territorial të Ukrainës dhe për gatishmërinë për të ndihmuar refugjatët ukrainas. Kryeministri Kurti falënderoi Ambasadoren Aliferi për angazhimin e saj për përparimin e raporteve mes Republikës së Kosovës dhe Republikës së Greqisë, përgjatë mandatit të saj si shefe e Zyrës Ndërlidhëse, dhe i uroi sukses në detyrat e radhës”, njoftoi tutje ZKM./teve1.info/
