Kryeministri i vendit, Albin Kurti, ka nderuar viktimat dhe të mbijetuarit e dhunës seksuale gjatë luftës në Kosovë.
Kurti së bashku me Ministren e Drejtësisë, Albulena Haxhiu, kanë bërë homazhe te memoriali Heroinat, derisa kanë përkujtuar viktimat e dhunës seksuale, e njëherit kanë nderuar të mbijetuarat e të mbijetuarit nga forcat e okupatorit serb, përcjell teve1.info.
“Në Ditën Memoriale të të mbijetuarve të dhunës seksuale gjatë luftës së fundit në Kosovë, të shpallur këtë vit nga Qeveria, Kryeministri i Republikës së Kosovës, Albin Kurti, nderoi viktimat dhe të mbijetuarit e dhunës seksuale gjatë luftës në Kosovë. Me homazhe te memoriali Heroinat, Kryeministri Kurti përkujtoi viktimat e dhunës seksuale, të cilat nuk janë më në mesin tonë, si dhe nderoi të mbijetuarat e të mbijetuarit për forcën e tyre të pashembullt. Kryeministri Kurti, së bashku me Ministren e Drejtësisë, Albulena Haxhiu, vendosi lule para memorialit, i cili përkujton mijëra gra dhe vajza, burra dhe djem, viktima e të mbijetuar të dhunës seksuale, që është përdorur si armë lufte nga forcat e okupatorit serb në luftën e fundit në Kosovë”, thuhet në komunikatë.
Në mbledhjen e 138-të, të mbajtur më 12 prill 2023, Qeveria e Republikës së Kosovës në bashkërendim me Presidenten e Republikës së Kosovës, ka shpallur datën 14 prill si Ditë Memoriale e të mbijetuarve të dhunës seksuale gjatë luftës së fundit në Kosovë./teve1.info/.
