Kryeministri në detyrë i Republikës së Kosovës, Albin Kurti, ka marrë pjesë në inaugurimin e gjeneratës së re të Kualifikimit të Nivelit V Post-Sekondar për Asistent për Nxënës me Nevoja të Veçanta Arsimore.
Gjatë këtij aktiviteti, Kurti ka shprehur mbështetjen e Qeverisë për nismat që fuqizojnë profesionistët e arsimit dhe që, sipas tij, krijojnë mundësi më të mira për fëmijët dhe të rinjtë në Kosovë.
Ai theksoi rëndësinë e arsimit gjithëpërfshirës, duke e cilësuar atë si një objektiv të rëndësishëm të politikave publike dhe si përgjegjësi të përbashkët për ndërtimin e një shoqërie më të drejtë.
“Një shoqëri që çmon dijen për të gjithë, prodhon më shumë drejtësi për secilin. Andaj, përgatitja profesionale e asistentëve për nxënës me nevoja të veçanta arsimore ka rëndësi të jashtëzakonshme për vendin tonë dhe të ardhmen e fëmijëve”, tha Kurti.
Ai shtoi se këta profesionistë kanë rol kyç në përkrahjen e fëmijëve dhe në krijimin e shkollave gjithëpërfshirëse, ku secili nxënës ndihet i barabartë dhe i mbështetur.
Në fund të fjalës së tij, kryeministri në detyrë Kurti falënderoi asistentët e ardhshëm për zgjedhjen e këtij profesioni, duke e cilësuar atë si një profesion fisnik me ndikim të madh shoqëror.
