Kryeministri i Kosovës, Albin Kurti me rastin e shënimit të Ditës Ndërkombëtare të Gruas, të hënën ka marrë pjesë në prezantimin e Rrjetit të Grave në Pozita Vendimmarrëse në Administratë Publike dhe institucione të pavarura, organizuar nga Agjencia për Barazi Gjinore, në kuadër të Zyrës së Kryeministrit.
Sipas Zyrës së Kryeministrit, Kurti gjatë fjalimit ka thënë se Kosova ka bërë hapa të rëndësishëm dhe ka hapur rrugë të reja për barazinë gjinore dhe drejtësinë institucionale.
“Hapat tonë si shtet tregojnë edhe një fokus politik por dhe konsistencë institucionale. Jo pak sfida e dimë që mbeten aty. Përvoja e vendit tonë mbartë një të vërtetë që nuk mohohet, dhe madje duhet të kthehemi shpesh në të kaluarën tonë, në mënyrë që ajo asnjëherë të mos na përsëritet. Një shoqëri e dalur nga okupimi i gjatë dhe lufta me gjenocid, ka kaluar në një liri kolektive pas shumë betejave çlirimtare të shumë grave e burrave, e tash, duket se betejën me lirinë individuale e ka si sfidë të radhës. Ndërtimi i një shoqërie ku secili individ ka mundësi të barabarta, pavarësisht gjinisë, pavarësisht diferencave. Në fakt, duhet të jemi të barabartë jo pse nuk kemi diferenca, por pikërisht për shkak se kemi diferenca”, është shprehur ai, pas listimit të disa nga veprimet dhe politikat mbështetëse për fuqizimin e gruas në vend.
Tutje thuhet se në këtë ngjarje është prezantuar Rrjeti i Grave në pozita vendimmarrëse në administratën publike dhe institucione të pavarura, që për synim sipas komunikatës e ka inkurajimin dhe mbështetjen e grave për pjesëmarrjen e tyre në pozita të larta drejtuese, promovimin e prezencës së grave udhëheqëse e të suksesshme, përmes avokimit të bazuar në parimin e meritokracisë dhe performancës.
Kurti ka ftuar gratë e këtij Rrjeti të mos mendojnë vetëm për rrugëtimin e tyre, por të kthejnë vëmendjen edhe te të rejat që janë në fillim të kësaj rruge.
Njëkohësisht, ai thuhet se u ka bërë thirrje që t’i afirmojnë sa më shumë shembujt pozitiv duke përmendur si të tillë kryeshefen e Postës së Kosovës, Nora Rraci dhe kryeshefen e Telekomit të Kosovës, Burbuqe Hana.
“Posta e Kosovës, për pesë vjet paraprakisht kishte humbje kumulative prej 5.3 milionë euro, dhe në vitin 2024 me Kryeshefen e Ekzekutive, Nora Rraci, doli me 350 mijë euro fitim. Në anën tjetër, Telekomi i Kosovës, pas tetë vjetëve me humbje kumulative 149 milionë euro dhe pas 11 milionë euro humbje në vitin 2021, në vitet 2023 dhe 2024 kishte fitim kumulativ 15 milionë euro. Pra, Nora Rraci dhe Burbuqe Hana, menaxhojnë miliona dhe a e dini çfarë, po dalin të suksesshme dhe vazhdimisht këto raste suksesi, këto të arritura mbresëlënëse ne së bashku, duhet t’i afirmojmë”, ka thënë kryeministri.
Ndërkaq, në fund të fjalës së tij, kryeministri i është referuar një studimi sipas së cilit gratë në politikë, gratë në administratë, nuk performojnë më dobët se burrat, por dyshimi paraprak në performancën e tyre është më i madh.
“Prandaj, me një solidaritet të përbashkët institucional gjinor le të angazhohemi që duke e dashur një të ardhme tjetër, të fillojmë ta mendojmë ndryshe edhe hapësirën që e krijojmë. Hapësira të cilat nuk e kopjojnë të shkuarën, por e ndërtojnë të ardhmen e re. Hapësira ku udhëheqja nuk është thjeshtë vazhdimësi e pushtetit, por një mënyrë për të mirëmbajtur dinjitetin dhe për ta sjellur barazinë, si në pjesëmarrje ashtu dhe në vendimmarrje. Ndonëse koha linearisht ecën në një kahje, rruga e këtij angazhimi tonë më përkushtim e solidaritet bëhet kohë që e fitojmë dhe nuk e humbasim”, ka përfunduar fjalën Kurti./teve1.info/
