Kurti tha se Kosova është shtet demokratik dhe se beson që secili qytetar përkundër racës është i barabartë para ligjit.
“Ballkani Perëndimor është në Evropë, por Evropa duhet të përfshihet në BE. E kuptoj që BE-ja ka nevojë për reforma të brendshme, por ato duhet të shkojnë për krah me zgjerimin e BE-së, zgjerimi i BE-së është thelbi i saj, kemi edhe 5 vende në BE që ende nuk na njohin. Duke vepruar kështu po i fuqizojnë ata që të kërkojnë konflikt”, tha Kurti.
Kurti më tej tha se 11 vjet pas konfirmimit të shtetësisë së Kosovës në Gjykatën Ndërkombëtare, marrëdhëniet e Kosovës me Serbinë nuk janë më të mira.
“Për shkak se Serbia ka dështuar në bashkëpunim dhe ende i jep mirënjohje kriminelëve të luftës, në vend se t’i ndëshkoj”, shtoi tutje Kurti.
“Kosova kërkon marrëdhënie fqinjësore të mira me fqinjin dhe jemi të gatshëm ta zgjasim dorën e pajtimit për vendin që ka kryer gjenocid në vendin tonë, nëse ata janë të gatshëm t’i çliroj grushtet e tyre”, tha Kurti.
Kurti foli edhe për sigurinë për çka tha se paqja dhe siguria në botë nuk po sfidohet vetëm në Ukrainë nga Rusia, por edhe në Evropë nga Serbia.
“E vërteta është që paqja dhe siguria në botë nuk po sfidohet edhe vetëm në Ukrainë nga Rusia por edhe në Evropë nga Serbia. Ata nuk kanë kufi të përbashkët por kanë qëllim të përbashkët”, tha Kurti.
Ai shtoi se Serbia nuk beson në vlerat e qytetarisë.
“Në përqafimin e vlerave të demokracisë kjo është themelore dhe duhet të jemi vigjilent, nuk mund të lejojmë fashizmin të dominoj”, tha Kurti.
Kurti përmendi që edhe Gjykata Ndërkombëtare e Drejtësisë ka deklaruar që shpallja e pavarësisë nuk e ka shkelur të drejtën ndërkombëtare.
