Korporata Energjetike e Kosovës (KEK) ndodhet në një moment historik transformimi, me investime që tejkalojnë 500 milionë euro, të orientuara drejt modernizimit, qëndrueshmërisë dhe përafrimit të plotë me standardet e Bashkimit Evropian.
Kryeministri në detyrë i Kosovës, Albin Kurti, ka theksuar se këto projekte janë thelbësore për sigurinë energjetike të vendit, stabilitetin ekonomik dhe zhvillimin afatgjatë.
Sipas Kurtit, modernizimi i turbinave dhe investimet në njësitë B1 dhe B2, rehabilitimi i thellë i njësisë A3, si dhe investimet madhore në termocentralet Kosova A dhe Kosova B, po i japin KEK-ut një dimension të ri zhvillimi. Po ashtu, për herë të parë, KEK-u ka hyrë në sektorin e energjisë së ripërtritshme përmes parkut solar.
Me përfundimin e këtyre projekteve, Kosovës pritet t’i shtohen rreth 150 MW kapacitete shtesë në termocentralet ekzistuese dhe 100 MW kapacitete të reja gjeneruese nga burimet e ripërtrishme.
Kurti bëri të ditur se që nga 19 dhjetori, KEK-u po operon me kapacitet maksimal, me pesë njësi gjeneruese aktive, për të garantuar furnizim të sigurt gjatë ditëve me konsum të lartë të energjisë.
Kryeministri në detyrë falënderoi punonjësit dhe menaxhmentin e KEK-ut për profesionalizmin, si dhe Bordin e Drejtorëve dhe Ministrinë e Ekonomisë për mbështetjen dhe mbikëqyrjen e këtyre projekteve strategjike, duke theksuar se KEK-u po ndërton themelet e një të ardhmeje më të sigurt, më moderne dhe më të gjelbër për qytetarët e Kosovës dhe brezat që vijnë.
