Kryeministri i Kosovës, Albin Kurti, sërish u shpreh optimist që takimi i sotëm në Ohër në kuadër të dialogut, do të përfundojë me normalizim të marrëdhënieve mes Kosovës dhe Serbisë.
Para nisjes së takimeve në Ohër, Kurti u deklarua duke thënë se nëse nuk do të ketë zbatim të planit evropian, atëherë do jetë e pamundur edhe arritja e marrëveshjes finale.
“Do të kemi takime bilaterale me ndërmjetësit evropian. Unë jam optimist, jam i vëmendshëm dhe do të bëjmë më të mirën për Republikën e Kosovës, kushtetutshmërinë, sovranitetin, integritetin terroterial, interesin publik dhe të popullit për të gjithë qytetarët pa dallim, sepse unë jam kryeministër i Republikës i të gjithë qytetarëve pa dallim. Do të kemi bisedime për planin e zbatimit, sepse nuk ka tekst të përfunduar. Andaj, përderisa nuk ka tekst të përfunduar, nuk mund të ketë përfundim të bisedimeve, e përderisa nuk ka përfundim të bisedimeve, nuk mund të ketë marrëveshje”, deklaroi Kurti në një prononcim të shkurtër për media.
Përveç optimizmit, kryeministri Kurti theksoi që ka ardhur me qëllim të mirë, duke mirëbesuar që bisedimet e sotme, do rrumbullakohen me normalizim të marrëdhënieve, raporton teve1.info.
“Përveç që jam optimist, kam ardhur me qëllim të mirë, me vullnet të mirë dhe në mirëbesim që dakordimin e arritur më herët, që fatkeqësisht nuk u nënshkrua në Bruksel, ta vazhdojmë përmes bisedimeve për planin e zbatimit dhe në këtë mënyrë ta rrumbullakojmë marrëveshjen me normalizim të marrëdhënieve”, potencoi Kurit më tej.
Derisa, e përmbylli duke thënë se për tu arritur marrëveshje, duhet të ketë tekst përfundimtar dhe të dakorduar.
“Pra, kam ardhur për bisedime për marrëveshje”, e përmbylli Kurti./teve1.info/.
