Kryeministri Albin Kurti ka pritur në një takim zëvendës-asistentin për çështje politike dhe politika të sigurisë të Sekretarit të Përgjithshëm të NATO-s, Javier Colomina.
Siç bëhet e ditur në një njoftim, Kurti e ka njoftuar Colominan për situatën e sigurisë në vend dhe aspiratat integruese të Kosovës.
“E njoftoi z. Colomina për situatën e sigurisë në vend, për synimet e institucioneve të vendit për anëtarësim në Bashkimin Evropian dhe NATO si dhe vendosmërinë e Qeverisë së Kosovës për të luftuar korrupsionin dhe krimin e organizuar në tërë territorin e Kosovës”, thuhet në një komunikatë të Zyrës së Kryeministrit.
Po ashtu bëhet e ditur se Kurti e ka falënderuar Colominan për kontributin e NATO-së në ruajtjen e paqes dhe sigurisë në rajon.
“Kryeministri Kurti gjithashtu theksoi përkushtimin e qeverisë për zhvillimin e kapaciteteve të mbrojtjes dhe sigurisë si dhe vullnetin për të kontribuar për paqen dhe sigurinë në botë, krahë NATO-s dhe partnerëve”, theksohet në komunikatë.
Në takimin me z. Colomina dhe ekipin e tij, kryeministri Albin Kurti u shoqërua nga Koloneli i Forcës së Sigurisë së Kosovës, Ejup Maqedonci.
