Kanë mbetur më pak se 24 orë deri në nisjen e seancës së jashtëzakonshme të së dielës.
Në ora 10:00, deputetët do të mblidhen sërish, por kësaj radhe për formimin e Qeverisë së re.
E sipas njohësit të Kushtetutës, Mazllum Baraliu deputetët duhet të votojnë në bazë të përgjegjësisë që kanë, e jo në bazë të partisë.
“Nga deputetët qoftë pakicë jo serbë, qoftë të shumicës, deputetë të partive të cilët mendoj unë që e kanë për detyrë në bazë të Kushtetutës që mandatin e tyre ta menaxhojnë personalisht, pra individualisht, pra jo partia ti dirigjoj dhe ta dezorientoi bindjen e tij ,përgjegjësinë e tij apo saj sepse edhe në betim e kanë, kur e kanë dhënë betimin e kanë për detyrë që të interesohen për Kosovën edhe interesin e saj”, tha ai.
E njohësi i politikës, Dorajet Imeri thotë se gjasat që nesër të ketë një Qeveri, janë minimale.
“Partitë politike kanë zgjedhur të mos bashkëpunojnë, mundësia që të kemi një qeveri nesër është tepër minimale, dhe kryeministrit Kurti i duhet një angazhim shumë i shtuar që të kërkoi mbështetje individuale për deputetët që të votojnë për shumicën e re në Kuvendin e Kosovës dhe rrjedhimisht për qeverinë e Republikës së Kosovës. Unë konsideroj se kjo është vështirë e arritshme besoj jemi më pranë zgjedhjeve se pranë qeverisë”, deklaroi Imeri.
Por, çfarë ndodh nëse partia e parë fituese nuk i ka numrat?
“Partia e dytë ose partia e parë apo dikush tjetër, një mandatar tjetër mund të provoj, i ka edhe dhjetë ditë afat në këtë rast partia e dytë fituese e zgjedhjeve është PDK-ja, do të mund ta bënte qeverinë nëse e bënë brenda 10 ditësh sipas nenit 95 të Kushtetutës e bënë një kabinet qeverisës prej 61 votash, të siguruara binte presidenten bëhet seanca dhe zgjidhet qeveria e opozitës”, tregon Baraliu.
Deri tani, partitë opozitare kanë deklaruar se nuk kanë asnjë marrëveshje me Vetëvendosjen për ta votuar mandatarin për kryeministër, Albin Kurti.
Ky i fundit, kur u pyet këtë të shtunë, nëse i ka numrat apo jo për formimin e Qeverisë, nuk pati një përgjigje.
