Kryeministri i Kosovës, Albin Kurti, po merr pjesë në Forumin vjetor Ekonomik në Delphi, i cili organizohet nën patronatin e Presidentes së Greqisë, Katerina Sakellaropoulou
Përmes një komunikate të lëshuar për media, thuhet se në ditën e parë të pjesëmarrjes, Kurti u takua me të Dërguarin e Posaçëm të Mbretërisë së Bashkuar për Ballkanin Perëndimor, Lord Stuart Peach, me ç’rast kanë diskutuar për marrëdhëniet dypalëshe mes Kosovës dhe Mbretërisë së Bashkuar.
Njëherit, pjesë e diskutimit ishte edhe mbarëvajtja e zgjedhjeve në katër komunat veriore të Kosovës.
“Në ditën e parë të pjesëmarrjes së tij, u takua me të Dërguarin e Posaçëm të Mbretërisë së Bashkuar për Ballkanin Perëndimor, Lord Stuart Peach, me të cilin u diskutua për marrëdhëniet dypalëshe ndërmjet Kosovës dhe Mbretërisë së Bashkuar dhe për zhvillimet e aktuale në Kosovë dhe rajon. Kryeministri Kurti falënderoi Lord Peach për mbështetjen e vazhdueshme të tij dhe të Mbretërisë së Bashkuar, që u konfirmua edhe në rastin e pranimit të aplikimit të Kosovës për anëtarësim në Këshillin e Evropës, në fillim të kësaj jave. Ata diskutuan për mbajtjen dhe mbarëvajtjen e zgjedhjeve në katër komunat veriore të Kosovës, të cilat ishin të qeta, paqësore dhe pa incidente”, thuhet në komunikatë.
Ndër të tjerash, kanë njoftuar se në takim u bisedua edhe për raportet mes Kosovës dhe Serbisë.
“Në takim gjithashtu u bisedua edhe për raportet ndërmjet Kosovës dhe Serbisë, rëndësinë dhe urgjencën e zbatimit të plotë dhe të pakushtëzuar të Marrëveshjes Bazë dhe Aneksit të Zbatimit të dakorduar në Bruksel, respektivisht në Ohër, dhe për pritjet nga takimi i radhës i nivelit të lartë politik që do të mbahet të martën e javës së ardhshme”, thuhet tutje, përcjell teve1.info.
Krahas takimeve, sot në orën 17:30, kryeministri Kurti po ashtu do të jetë panelist në një diskutim në kuadër të forumit me titull “Ballkani Perëndimor në Fushën e re të Shahut të Gjeopolitikës”./teve1.info/.
