Deputeti nga radhët e LDK-së, Driton Selmanaj i ka kërkuar llogari kryeministrit Albin Kurti për raportin final të fizibilitetit për liqenin e Ujmanit, i përgatitur nga Departamenti i Shtetit për Energjinë, që sipas tij, i është dorëzuar Qeverisë më 23 qershor të 2021 e këta të fundit nuk kanë dhënë një përgjigje edhe pas 21 muajsh.
Lidhur me këtë, Kurti theksoi se raporti në fjalë në tërësi flet për Ujmanin në kontekst të Kosovës dhe të shfrytëzimit të tij për përfitim të Kosovës, e jo për përdorim të përbashkët me Serbinë, përcjell teve1.info
“Pjesa më e madhe e raportit, tre nga katër pikat, përmban pika për veprime teknike, inxhinierike, në kuadër të sistemit të Ibër-Lepencit. Raporti e ka korrigjuar atë që e ka bërë gabim ish-kryeministri, ku ka pretenduar dhe i cili deklarohet publikisht që Ujmani mund të shfrytëzohet bashkë me Serbinë. Pra raporti askund se pëmend një pasaktësi të tillë, edhe siç e thotë edhe parashtruesi i pyetjes retorike, mbrojtësi më i madh i sovranitetit tonë e ka kuptuar më mirë se sa e pasaktë dhe e pamundur ka qenë ai pretendim për shfrytëzim të përbashkët”, deklaroi Kurti në Kuvend.
Duke komentuar marrëveshjen e vitit 2022, nga edhe rrjedh ai raport, kreu i Ekzekutivit tha se nëse i njëjti do kishte qenë i mirë për Serbinë, ajo do ta kishte përdorur.
Ai potencoi se është fat i mirë kjo temë “e nënshkruar nga LDK-ja” nuk është marrë seriozisht.
“Ne nuk e kemi përdorur, sepse në vazhdimësi kemi qenë në të drejtën tonë dhe kemi theksuar e insistuar se nuk kemi se çfarë flasim për pronën tonë. Por është indikative që ju si deputet opozitar, pa nevojë e sillni këtë temë e cila nuk i shkon përshtati Kosovës. Mbase edhe për shkak se subjekti juaj e ka nënshkruar atë marrëveshje që e hap çështjen e Ujmanit si temë, shfrytëzimin e përbashkët të një aseti të Kosovës, por për fat të mirë kjo ide nuk është marrë seriozisht e nuk është shtyrë përpara nga askush”, shtoi Kurti. /Teve1.info/
