Sot në Kuvendin e Kosovës është diskutuar arrestimi i drejtorit të Korporatës Energjetike të Kosovës, Nagip Krasniqi, i cili dyshohet për keqpërdorim të pozitës, ushtrimit të ndikimit dhe konflikit të interesit.
Partitë opozitare në seancën e sotme kanë kërkuar nga qeveria që të raportojnë për arrestimin e kryeshefit të KEK-ut.
Lidhur me këto diskutime, ka reaguar kryeministri i Kosovës, Albin Kurti, ku i ka quajtur gëzim opozitar.
“Kur erdha në seancë të Kuvendit, këtu kish nisë seanca gjyqësore për Nagip Krasniqin, pra unë po intervenoj në intervenim. Unë porsa hyra këtu në seancë, unë mendova që jam në sallë gjyqi, e jo në seancë plenare, këtu kish fillu gjyqi”, ka thënë Kurti, raporton teve1.info.
“Mua më thanë të ia tregoj vendin Nagip Krasniqit, por qysh me ia tregu vendin njeriut që është në burg, çfarë vendi me i tregu unë atij? Ai është në burg dhe njeriut në burg i bëhet në parlament gjyqi, prandaj unë ndërhyra. Unë nuk ndërhyra po të flitej për KEK-un, por këtu iu bë gjyqi personit në Kuvend në kuadër të një lloj gëzimi opozitar që qenka arrestu dje një person”, tha kryeministri.
Kurti për arrestimin e Krasniqit, ka debatuar edhe me deputeten e Lidhjes Demokratike të Kosovës.
“E falënderoj shumë deputeten Hykmete Bajrami që tregoi se qysh janë kanë bërë këta dikur. Pra, ajo tha se po të dëshironte Blerim Isufaj të bëhej kryeprokuror me çdo kusht, kishte ardhur me dosjen e Nagip Krasniqit te unë si kryeministër që të bëjmë pazar. Ama ai e di që unë s’bëj pazar, ai ka ardhur te ju ashtu. Prandaj, ju e dini qysh bëhet kjo punë për t’u bërë dikush kryeprokuror. Te unë s’ka ardhur se e ka ditë që s’ka për çka vjen”.
