Kryeministri i Kosovës, Albin Kurti, ka takuar drejtoreshën ekzekutive të Europol-it, Catherine De Bolle, në Mynih.
Ai gjatë këtij takimi sipas komunikatës së Qeverisë e ka njoftuar atë për përpjekjet e Qeverisë për luftimin e krimit dhe korrupsionit si dhe ngritjen e vendin sa i përket perceptimit të korrupsionit.
“Gjatë dy viteve të fundit Policia e Kosovë ka zhvilluar 854 operacione policore, ku janë arrestuar 3202 persona, prej të cilëve 301 zyrtarë shtetërorë. Në dy vite qeverisje janë konfiskuar gjithsej 1.8 ton substanca narkotike, nga të cilat 400 kilogram në vitin 2021, si rezultat i operacionit të përbashkët me DEA-n amerikane dhe autoritetet italiane dhe ato të Shqipërisë”, ka thënë ndër tjera Kurti, thuhet në komunikatë.
Ai tha se nuk mund të ketë zhvillim të qëndrueshëm pa sundim të ligjit, dhe shprehu vullnetin dhe gatishmërinë për më shumë bashkëpunim me Europol-in kundër krimit të organizuar, me theks në luftën kundër kontrabandës, trafikimit të drogës, trafikimit të qenieve njerëzore dhe në siguri kibernetike.
Drejtorja Ekzekutive e Europol-it, De Bolle, u shpreh e kënaqur me marrëveshjen e nënshkruar në vitin 2021 ndërmjet Ministrisë së Punëve të Brendshme dhe Europol, që ia mundëson Kosovës emërimin e një zyrtari të zyrës ndërlidhëse në Europol dhe krijon kanal të sigurtë të komunikimit dhe shkëmbimit të informacioneve, thekson komunikata.
Po ashtu edhe me pjesëmarrjen, bashkëpunimin dhe kontributin e Policisë së Kosovës në aktivitete të përbashkëta me Europol-in dhe EMPACT. Me këtë të fundit, De Bolle theksoi se bashkëpunimi është katërfishuar./teve1.info/
